वीपी कोइराला स्वास्थ्य विज्ञान प्रतिष्ठान धरानको जग्गामा तरकारी बजार निर्माण गर्न धरान उपमहानगरपालिकालाई उच्च अदालत विराटनगरले रोक लगाएको छ । नगर प्रमुख हर्क साम्पाङले वीपी प्रतिष्ठानको ग्रिनबेल्ट मार्गमा तरकारी बजारको सेड निर्माण सुरु गरेका थिए । तर उच्च अदालत विराटनगरले मंगलबार काम रोक्न अन्तरिम आदेश जारी गरेको हो ।
मेयर साम्पाङले बजार निर्माण गर्न खोजेपछि वीपी प्रतिष्ठानका रजिष्ट्रार सूर्यप्रसाद संग्रौलाले प्रतिष्ठानको जग्गामा संरचना नबनाउन आग्रह गरेका थिए । तर साम्पाङले कर्मचारीसँग कुरा नगर्ने भन्दै उनको आग्रह मानेका थिएनन् ।
