खेलकुद संघको अध्यक्षले खेलाडीलाई ‘चुम्बन’ गरेपछि
स्पेन फुटबल संघका अध्यक्ष लुइस रुबिलेसले विश्वकप विजेता स्टार खेलाडी जेमी हेरमोसो (जर्सी १०) लाई चुम्बन गरेपछि त्यहाँका खेलकुदमन्त्रीले चर्को आलोचना गरेका छन् । कार्यवाहक मन्त्री म्याकवेल इसेटाले स्पेनी पब्लिक रेडियोमा भनेका छन्, ‘कोही खेलाडीलाई बधाई दिन ओठमै चुम्बन गर्नु अस्वीकार्य छ ।’
मन्त्री इसेटाले फुटबल संघका अध्यक्षले माफी माग्नुपर्ने पनि बताए । आइतबार सिड्नीमा भएको फाइनलमा स्पेनले इंग्ल्यान्डलाई १–० ले पराजित गर्दै महिला विश्वकपको उपाधि जितेको थियो । उपाधि जित्दाको स्थिति भावनात्मक रूपमा निकै नाजुक भए पनि त्यस्तो अवस्थामा फुटबल संघ अध्यक्ष रुबिलेस निकै होसियार भएर प्रस्तुत हुनुपर्ने भन्दै खेलकुदमन्त्रीले असन्तुष्टि जनाएका हुन् ।
पदक थाप्न जानेक्रममा रहेकी हेरमोसोलाई फुटबल संघका ४५ वर्षीय अध्यक्ष रुबिलेसले चुम्बन गरेका थिए । लगत्तै उक्त घटनाको विरोधमा अन्तर्राष्ट्रियस्तरबाटै प्रतिक्रिया आउन सुरु गरेको थियो । स्पेनी फुटबल संघका पदाधिकारीले भने पूरा घटना स्वतःस्फूर्त रहेको पनि दाबी गरेका छन् । ती पदाधिकारीका अनुसार अध्यक्ष र खेलाडीबीच नजिकको व्यक्तिगत सम्बन्ध रहँदै आएको छ ।
चेन्जिङ रूममा खुसियाली मनाउने क्रममा हेरमोसोले पूरा घटनाक्रम आफूलाई मन नपरेको प्रतिक्रियासहितको भिडियो इन्स्ट्राग्राममा हालेकी छन् । आइतबार अबेर फुटबल संघले हेरमोसोको अर्को प्रतिक्रिया पनि बाहिर ल्याएको छ । जसमा उनले पूरा घटनाक्रम स्वतःस्फूर्त रहेको र यस पछाडि विश्वकप जित्नुको खुसियाली नै रहेको बताएकी छन् ।
