बलियो प्रतिद्वन्द्वी नेदरल्यान्ड्सको सामना गर्दै नेपाल

आईसीसी विश्वकप क्रिकेट लिग-२ को दोस्रो खेलमा नेपालले आज (शनिबार) बलियो प्रतिद्वन्द्वी नेदरल्यान्ड्सको सामना गर्दै छ । दुई देशबीचको खेल त्रिवि क्रिकेट मैदानमा बिहान सवा ९ बजे शुरू हुनेछ । नेपालको रोहित पौडेल र नेदरल्यान्ड्सको स्कट एडवार्ड्सले कप्तानी गर्नेछन् । विश्वकपसमेत खेलेका खेलाडी सम्मिलित बलियो टोली नेदरल्यान्ड्स लिग(२ मा सुखद् सुरुवात गर्ने लक्ष्यमा छ । पहिलो खेलमा हार व्यहोरेको नेपालको कमब्याक गर्ने लक्ष्य छ । पहिलो खेलमा नेपाल नामिबियासँग पराजित भएको थियो ।

पछिल्लो पटक गत जुनमा जिम्बावेमा सम्पन्न आईसीसी एक दिवसीय विश्वकप छनोटमा नेपाल नेदरल्यान्ड्ससँग ७ विकेटले पराजित भएको थियो । नेपाललाई हराएर नेदरल्यान्ड्स विश्वकपमा पुगेको थियो । विश्वकपमा नेदरल्यान्ड्सले बंगलादेश र दक्षिण अफ्रिकाजस्ता बलिया टिमलाई हराएको थियो ।

हालसम्म नेपाल र नेदरल्यान्ड्सबीच टी–२० मा नौपटक र एकदिवसीयमा तीनपटक भिडन्त भएको छ । टी–२० मा नेपाल र नेदरल्यान्ड्सले समान ४–४ खेल जितेका छन् ।

तर, एकदिवसीय खेलमा भने नेदरल्यान्ड्सको पल्ला भारी देखिन्छ । हालसम्म भएका तीनमध्ये दुई एकदिवसीय नेदरल्यान्ड्सले जितेको छ । एक खेलमा भने नेपाल विजयी भएको थियो ।  नेपालको घरेलु मैदानमा नेदरल्यान्ड्स पहिलो पटक ओडीआई खेल्दैछ ।

Related Articles

Leave a Reply

Your email address will not be published. Required fields are marked *

Back to top button