राजनीतिलाई कसैले पनि दुषित पार्नु हुँदैन : अध्यक्ष ओली

नेकपा एमालेका अध्यक्ष केपी शर्मा ओलीले राजनीतिलाई दुषित गर्न नहुने बताउनुभएको छ । आज ललितपुरको च्यासलस्थित पार्टी कार्यालयमा आयोजित ‘युगदूत’ विमोचन तथा स्रष्टा भेटघाट कार्यक्रममा अध्यक्ष ओलीले सबै नीतिहरुको मुहान राजनीति भएकाले यसलाई दुषित गर्न नहुने बताउनुभएको हो । राजनीतिमा लागेका केही व्यक्ति खराव हुन सक्ने भएपनि समग्र राजनीतिलाई नै खराव भन्न नमिल्ने उहाँले बताउनुभयो ।

ओलीले सुन्दर र आधुनिक भविष्य निर्माण गर्न दु्रत गतिले अघि बढ्नुपर्ने र समाजको विकास गर्नुपर्ने जिकिर गर्नुभयो । उहाँले अब मुलुकमा ३३ प्रतिशत महिला सहभागीताको लडाई सकिएको र त्यसभन्दा अघि बढ्नुपर्ने उल्लेख गर्नुभयो । पूर्व प्रधानमन्त्रीसमेत रहनुभएको ओलीले राजनीति भनेको सबै नीतिहरुको मूल नीति भएको भन्दै भ्रष्ट नीति, छुल्याहा नीति, चुक्ली नीति, ढाँटछल र धोखाधडीवाला नीति नभएको बताउनुभयो ।

‘राजनीतिमा यस्तो त भइहाल्छ नि ! भन्ने चलन छ आजभोलि । नहुनुपर्ने कुरा राजनीतिमा पनि हुनुहुँदैन’, ओलीले भन्नुभयो, ‘अपवित्र पनि पवित्र हुने राजनीतिमा हुँदैन ।’ अध्यक्ष ओलीले सबै मुहान फोहोर नभएको पनि प्रष्ट पार्नुभयो । अरस्तुले दाँत गनेजस्तो हुनुनहुने भन्दै उहाँले अरस्तुको कथा समेत सुनाउनु भयो ।